कोलार घोटी रस्त्यावर अपघात

संगमनेर तालुक्यातील कोकणगाव शिवारात कोल्हार-घोटी राज्यमार्गावर आज रविवारी (दि. 15) पहाटेच्या सुमारास भीषण अपघात झाला. या अपघातात तिघांचा मृत्यू झाला आहे. तर सात ते आठ जण जखमी झाल्याची माहिती मिळत आहे.

शिर्डीकडे जाणाऱ्या प्रवासी ट्रॅव्हल्स आणि आंबे घेऊन जाणाऱ्या ट्रक यांच्यात जोरदार धडक झाली. अपघात इतका भीषण होता की, ट्रक आणि ट्रॅव्हल्सच्या पुढील भागाचा अक्षरशः चुराडा झाला.

घटनेची माहिती मिळताच पोलीस घटनास्थळी दाखल झाले. स्थानिकांच्या मदतीने जखमींना उपचारासाठी रुग्णालयात दाखल करण्यात आले आहे. या अपघातामुळे कोल्हार-घोटी राज्यमार्गावर वाहतूक काही काळ ठप्प झाली होती. अपघाताचे कारण अद्याप स्पष्ट झालेले नाही.

याबाबत सविस्तर माहिती अशी की, तालुक्यातील कोल्हार घोटी महामार्गावरून ट्रॅव्हल एम. एच.46 सी. यु. 2754 प्रवाशांना घेऊन शिर्डी, शनिशिंगणापूर देवस्थानकडे जात असते. आज देखील गाडी संगमनेर वरून प्रवाशांना घेऊन सकाळी शिर्डीकडे जात होती. मोठ्या संख्येने यामध्ये प्रवाशी बसलेले होते. बहुतांश प्रवाशी हे देव दर्शनासाठी बाहेर गावांमधुन आले होते. सकाळी कोकणगाव मध्ये लोणीच्या दिशेने समोरून एम. एच.12 एन. एक्स. 1454 हा ट्रक आला. सदर ट्रक आंब्याने भरलेला होता त्यामुळे, गाडीत खूप लोड होता. ट्रक व ट्रॅव्हलचालक यांना वेगावर नियंत्रण करता आले नाही. त्यामुळे, दोन्ही गाड्या समोरा समोर एकमेकांना धडकल्याने रस्त्याच्या खाली फेकल्या गेल्या.

घटना रविवार दि. १५ जुन रोजी सकाळी पावणे सात वाजण्याच्या सुमारास घडली. या अपघातात प्रवीण सोपान कांदळकर, (वय 28, सुकेवाडी, ता. संगमनेर), फिरोज लाला शेख (वय 46, कसारादुमाला, ता. संगमनेर), अंजु प्रवीण वाल्मिकी (वय 39, हरियाणा) असे तिघे जण मयत झाले आहे. तर हर्षिता सोनू वाल्मिकी, बिराला पूनम, सोनिया रमेश बिर्ला, रिया अजय चावरीया, ऐश्वर्या चंद्रशेखर पाटील, लता सुरेश, चक्रनारायण (सर्व मुंबई), प्रथमेश राजेंद्र कोल्हे, पोहेगाव, ता. कोपरगाव मोहमद रफीक जलील शेख नाईकवाडपुरा, ता. संगमनेर) हे गंभीर जखमी झाले असुन त्यांच्यावर शहरातील एका खाजगी रुग्णालयात उपचार सुरू आहेत.